نزیكەی 40 ڕۆژ تێدەپەڕێت بەسەر دابەشكردنی مووچەی مانگی (شوبات)، بەڵام تا ئێستا هیچ وادەیەك بۆ دابەشكردنی مووچەی مانگی (ئازار)ی فەرمانبەران دیاری نەكراوە و حكومەتی هەرێم خۆی لەئاستی بێدەنگ كردووە.

لە 27ی حوزەیرانی ئەمساڵ بە وەزارەتی تەندروستی دابەشكردنی مووچەی مانگی شوبات دەستی پێكرد بە لێبڕینی 21% بۆ فەرمانبەران و 50% بۆ پلەباڵاكان ئەویش دوای دواكەوتنی بۆ نزیكەی 60 ڕۆژ، هاوكات لە ئێستاشدا نزیكەی 40 ڕۆژ تێدەپەڕێت بەسەر ئەو بەروارەدا و هیچ وادەیەك بۆ پێدانی مووچەی مانگی ئازار دیاری نەكراوە و بەرپرسانی دارایی-ش هیچ لێدوانێك لەو بارەیەوە نادەن.

لە ماوەی ڕابردوودا، جوتیار عادل، وتەبێژی فەرمی حكومەتی هەرێم لە كۆنگرەیەكی ڕۆژنامەوانیدا ڕایگەیاند، كە ئەولەویەتی حكومەتی هەرێم دابەشكردنی مووچەیە، بەڵام داهات كەمی كردووە و بەپێی بەردەستبوونی داهات مووچە دەدرێت.

بەگوێرەی زانیارییەكان، حكومەتی هەرێم چاوەڕێی ڕێككەوتنە لەگەڵ بەغدا بۆ ئەوەی پارەی لە بەغداوە بۆ بێت و ئەوجا دەست بە دابەشكردنی مووچە بكات، بەڵام تا ئێستا حكومەت نیازی خۆی ئاشكرانەكردووە ئاخۆ بەتەواوی مووچە دابەش دەكات یاخود بە لێبڕینەوە.

جێ باسە لە ئێستادا بڕی پارەی مووچەخۆرانی هەرێم لای حکومەت بەم شێوەیەیە:

12 مووچەی تەواو

32 مووچەی پاشەکەوت

یەک مووچەی لێبڕینی 21%

ز.س

دوای تێپەڕبوونی 30 کاتژمێر بەسەر تەقینەوەکەی بەیرووت، گەنجێک بەشێوەیەکی سەرسووڕهێنەر  لە دەریا دەدۆزرێتەوە.

تیمەکانی فریاگوزاریی و رزگارکردنی لوبنان بەردەوامن لە گەڕان بەدوای تەرمی قوربانییەکان و چارەنووسی ونبووەکانی لە ژێر دار  و پەردووی باڵەخانە و خانووە رووخاوەکان، کە بەهۆی تەقینەوەکەی رۆژی سێشەممەی بەندەری لوبنانەوە زیاتر لە 137 کەس کوژران و 5 هەزاری دیکە برینداربوون.

تیمە لوبنانییەکان تێپەڕبوونی دوای 30 کاتژمێر بەسەر تەقینەوەکە، گەنجێکی لوبنانیان لە دەریا دەرهێناوە و رزگاریانکردووە. چالاکڤانان لە تۆڕە کۆمەڵایەتییەکان ئاماژە بەوەدەکەن ئەو گەنجە ناوی "ئەمین زاهد"ە، تاوەکو ئێستا لە ژیاندا ماوە، بەڵام تەندروستی جێگیر نییە.

چالاکڤانان دەڵێن هەندێک لەو کەسانەی لە نزیک شوێنی تەقینەوەکە بوونە، بەهێزی تەقینەوەکە فڕێی داونەتە نێو دەریا، لەگەڵ ئەوانەشی لەنێو یەخت و کەشتییەکان بوون، بۆیە ئەمە وایکردووە دەیان کەس لە کەسوکاری ونبووەکان لە نزیک بەندەرەکە بۆ سۆراخی ونبووەکانیان کۆببنەوە. 

z.s

سەرۆکی دیوانی کۆشکی سپی رایگەیاند، ویلایەتە یەکگرتوەکانی ئەمریکا بەدوری نازانێت کە تەقینەوە گەورەکەی بەیروت بەهۆی هێرشی تیرۆرستی بوبێت، تا ئێستاش واشنتن زانیاری هەواڵگیری لەسەر روداوەکە کۆدەکاتەوە.

مارک میدۆز، سەرۆکی دیوانی کۆشکی سپی لەمیانەی چاوپێکەوتنێکدا لەگەڵ تۆڕی هەواڵی CNN-ی ئەمریکی رایگەیاند، "واشنتن هیواخوازە کە تەقینەوەکەی بەیروت تەنها روداوێکی دڵتەزێن بێت کە بەهۆی کۆگا کردنی ماددەی کیمیایی مەترسیدارەوە رویدابێت، نەک هێرشی تیرۆرستی".

ئاماژەی بەوەشکرد، "وڵاتەکەی بە دوری نابینێت روداوەکە بەهۆی بۆمب یان هێرشی تیرۆرستییەوە رویدابێت، لەو بارەیەوە  تا ئێستا بەرپرسانی وڵاتەکە زانیاری هەواڵگیری کۆدەکەنەوە".

دوێنێ چوارشەممە دۆناڵد ترەمپ، سەرۆکی ویلایەتە یەکگرتوەکانی یٔەمریکا لەمیانەی کۆنگرەیەکی رۆژنامەوانیدا رایگەیاند، پێدەچێت تەقینەوەکەی بەیروت هێرشێکی خراپەکاری یاخود تەقینەوەی بۆمب بوبێت، سەبارەت بە تەقینەوەکە لەگەڵ ژەنەڕاڵەکانی وڵاتەکەیدا قسەی کردوە، روداوەکە لە تەقینەوەی بۆمب دەچێت نەک کارلێکی کیمیایی.

4ی ئاب تەقینەوەیەکی گەورەی لە بەیروتی پایتەختی لوبنان رویدا و بەهۆیەوە تایٔێستا 137 کەس گیانیانلەدەستداوە و زیاتر لە پێنج هەزار کەسیش برینداربون.

ز.س

سکرتاریەتی حیزبی دیموکراتی کوردستان رایگەیاند: جەلیل گادانی، ئەندامی  پێشووی رێبەریی حیزبی دێموکرات و تێکۆشەری دێرینی ئەم حیزبە، بەهۆی کۆرۆناوە گیانی لەدەستداوە.

ئەمڕۆ پێنجشەممە، سکرتاریەتی حیزبی دێموکراتی کوردستان لە ماڵپەڕی فەرمیی خۆیاندا بڵاویان کردووەتەوە: "جەلیل گادانی، کە نزیک بە هەفتەیەک بوو لە یەکێک لە نەخۆشخانەکانی هەرێمی کوردستان لەژێر چاودێری چڕی پزیشکیدا بوو، ئەمڕۆ پێنجشەممە کۆچی دوایی کرد".

جەلیل گادانی ساڵی 1934 لە شاری مەهاباد لە دایکبووە. ساڵی 1948 بووەتە ئەندامی حزیبی دیموکراتی کوردستان و دواتر لە سەردەمی حەمەرەزا شای پەهەلەویدا لەسەر چالاکی سیاسی 13 ساڵ زیندانی کراوە.

ئەو لە زیندان زمانی فەرەنسی خوێندووە و بڕوانامەی بەکالۆریۆسی لە زمانی فەرەنسی لە زانکۆی تاران وەرگرتووە.

دوای رووخانی حکومەتی پاشایەتی کە حیزبی دیموکرات چالاکی ئاشکرا دەستپێدەکات، وەک ئەندامی رێبەریی حیزب هەڵدەبژێرێت و دەبێتە ئەندامی دەفتەری سیاسی.

ساڵی 1988 جەلیل گادانی و ژمارەیەک لە ئەندامانی حیزبی دیموکرات جیا دەبنەوە، ناوی حیزبی دێموکراتی کوردستانی ئێران – رێبەرایەتی شۆڕشگێڕ لەسەر خۆیان دادەنێن و جەلیل گادانی دەبێتە سکرتێری گشتی.

تاوەکوو ساڵی 1996 کە لەگەڵ حیزبی دیموکرات یەکدەگرنەوە، سکرتێری گشتی رێبەرایەتی شۆڕشگێڕ بووە. دواتر لە کۆنگرەی 10ی حیزبی دیموکرات، یەکەمین کۆنگرەی دوای یەکگرتنەوە، دیسان وەک ئەندامی رێبەری و دەفتەری سیاسی حیزبی دیموکرات هەڵدەبژێرێتەوە.

لەساڵی 2006 کە دیسان ریزەکانی حیزبی دیموکرات لێکدەترازێت، جەلیل گادانیشیان لەگەڵ دەبێت. لە کۆنگرەی 14ی حیزبی دێموکراتی کوردستاندا، یەکەمین کۆنگرەی دوای لێکدابڕان، وەک بەرپرسی کۆمیسیۆنی چاودێری حیزبی دیموکراتی کوردستان دەستنیشان کرا.

ز.س