له‌ سلێمانی پیاوێك هاوسەر و خەسووی بەر چەقۆ دەدات

پیاوێك لە ناوچەی تاسڵوجە بە چەقۆ هەریەك لە هاوسەر و دایكی هاوسەرەكەی برینداردەكات و وتەبێژی پۆلیسی سلێمانیش دەڵێت، تۆمەتبارەكە دەستگیركراوە.

سەركەوت ئەحمەد، وتەبێژی بەڕێوەبەرایەتی پۆلیسی پارێزگای سلێمانی ڕایگه‌یاند، ڕوداوەكە ئێوارەی دوێنێ بووە، پیاوەكە چووەتە سەر ماڵی باوانی هاوسەرەكەی و پاش دەمەقاڵە دوو چەقۆی لە هاوسەرەكەی و دووانیشی لە خەسووی داوە.

وتیشی، “دوای ڕوداوەكە بە یەك كاتژمێر تۆمەتبار لەلایەن هێزەكانی پۆلیسەوە دەستگیركراوە”.

وتەبێژەكەی پۆلیس ئاماژەی بەوەشكرد، كێشەكەیان خێزانی و لەنێوان ژن و مێردەكەدا بووە كە هەردووكیان تەمەنیان لە سەروو 25 ساڵەوەیە.

ئەوەشی خستەڕوو، دوو بریندارەكە باری تەندروستییان جێگیرە و لە نەخۆشخانە لەژێر چارەسەركردندان، تۆمەتبارەكەش بەپێی ماددەی 403 لە یاسای سزادانی عێراقی دەستگیركراوە.

ڕوداوەكە هاوكاتە لەگەڵ ڕۆژی نیشتمانیی جیهانیی ڕوبەڕوبوونەوەی توندوتیژی دژی ژنان كە لە ساڵی 1999وە لەلایەن نەتەوەیەكگرتووەكانەوە دیاریكراوە.

karwan

مامۆستا ئه‌حمد جوانمێری : حزبی زه‌حمه‌تكێشان هه‌موو هاوكاریه‌كی هه‌فته‌ی به‌ره‌نگاربوونه‌وه‌ی توندوتیژی ده‌كات

مامۆستا ئه‌حمد به‌رپرسی كۆمیته‌ی پارێزگای سلێمانی حزبی زه‌حمه‌تكێشانی كوردستان به‌ ئێستانیوزی راگه‌یاند، وه‌ك زه‌حمه‌تكێشان له‌ سلێمانی پێشوازیمان كرد له‌ چالاكیه‌كانی هه‌فته‌ی به‌ره‌نگاربوونه‌وه‌ی توندوتیژی دژی ژنان..ئێمه‌ هاوكار ده‌بین له‌ دروست كردنی كۆمه‌ڵگایه‌كی خاوه‌ن ماف و یه‌كسان بۆ هه‌موو تاكه‌كانی بێ جیاوازی بۆ ژن و پیاو.

جێگه‌ی باسه‌ رۆژی 23/11/2020 پانێلێك لەهۆڵی بارەگای كۆمیتەی پارێزگای سلێمانی حزبی زەحمەتكێشانی كوردستان سه‌باره‌ت به‌ توندوتیژی دژی ژنان به‌ڕێوه‌چوو.

ترەمپ ناڕاستەوخۆ دان بە شکستی خۆی دەنێت

سەرۆکی ئەمریکا و کاندیدی پارتی کۆماریخوازەکان ناڕاستەوخۆ دان بە شکستی خۆی لە هەڵبژاردنەکان، دەنێت.

دۆناڵد ترەمپ، سەرۆکی ئەمریکا لە هەژماری تایبەتیی خۆی لە تۆڕی کۆمەڵایەتیی (تویتەر)، رایگەیاندووە، بە تیمەکەی لە کۆشکی سپی (کۆشکی سەرۆکایەتیی ئەمریکا)ی راگەیاندووە، دەست بە ئامادەارییەکان بکەن بۆ گواستنەوەی دەسەڵات.

تا ئێستا دۆناڵد ترەمپ رەتی دەکردەوە دەستبەرداری پۆستەکەی بێت و سەرەڕای دۆڕانی لە هەڵبژاردنی سەرۆکایەتی، کەچی خۆی بە براوە دەناساند.

رۆژی 3-11-2020، هەڵبژاردنی سەرۆکایەتیی ئەمریکا بەڕێوە چوو و تێیدا دۆناڵد ترەمپ وەک کاندیدی کۆماریخوازەکان، هەوڵی سەرکەوتن بەسەر جۆ بایدنی کاندیدی دیموکراتەکان و بوونەوە بە سەرۆکی ئەمریکا بۆ خولێکی دیکە، کە چوار ساڵە، دەدا.

بەپێی ئەنجامی هەڵبژاردنەکە، جۆ بایدن بە جیاوازییەکی زۆری دەنگەکانەوە سەرکەوت بەسەر دۆناڵد ترەمپ.

چالاكیه‌كانی هه‌فته‌ی به‌ره‌نگاربوونه‌وه‌ی توندوتیژی دژی ژنان درێژه‌ی هه‌یه‌

بەبۆنەوەی (٢٥) نۆڤمبەر ڕۆژی بەرەنگاربونەوەی توندووتیژی ژنان ، کەمپینی یەک ڕێزی ژنان دژی داگیرکاری و توندو تیژی..

سەرلەئێوارەی 23/11/2020 پانێلێکی ساز دا لە بارەگای حزبی زەحمەتکێشانی کوردستان بە ئامادەبوونی ژمارەیەکی بەرچاو لە سیاسی و هونەرمەند و نوسەرو شاعیرو کەسانی بێلایەن.  پانێلەکە لەلایەن  سۆما فەرهاد ئەندامی کەمپین

 فەوزیە خان ئەندامی پارتی سەوزی کوردستان ،کەژاڵ عبدالقادر دەستەی ژن ژیانە مەیکوژە.

 وە پانێلەکە لەلایەن شەیدا مەعروف ئەندامی حزبی زەحمەتکێشانی کوردستان و بەڕێوە چوو.

جێگه‌ی باسه‌ ماوه‌ی هه‌فته‌یه‌كه‌ چالاكیه‌كان به‌رده‌وامن و له‌م باره‌یه‌وه‌ شه‌یدا مه‌عروف به‌ ئێستانیوزی راگه‌یاند، ئێمه‌ به‌رده‌وام ده‌بین له‌كاره‌كانمان و هه‌وڵ ده‌ده‌ین بێ جیاوازی هاوكاری هه‌موو لایه‌ك بین بۆ ئه‌وه‌ی به‌سه‌ر كه‌وتوویی كه‌مپینه‌كه‌ و هه‌ڵمه‌ته‌كه‌ به‌رده‌وام بێت.

نێردەی نەتەوە یەکگرتووەکان راپۆرتێک لەبارەی بارودۆخی عێراق دەخاتە روو

 

نێردەی تایبەتی نەتەوە یەکگرتووەکان لە عێراق راپۆرتێک لەبارەی بارودۆخی ئەو وڵاتە، دەخاتە روو.

بڕیارە کاتژمێر 6ـی ئێوارەی ئەمڕۆ سێشەممە 24-11-2020 بە کاتی هەولێر (کاتژمێر 10ـی سەرلەبەیانیی ئەمڕۆ بە کاتی نیویۆرک)، جێنین هێنیس پلاسخارت، نێردەی تایبەتی نەتەوە یەکگرتووەکان لە عێراق، راپۆرتەکەی بخاتە روو.

جێنین هێنیس پلاسخارت لە بەغدای پایتەختی عێراقەوە بەشێوەی ئۆنڵاین (ڤیدیۆ کۆنفرانس) بەشداریی کۆبوونەوەیەکی ئەنجوومەنی ئاسایشی نێودەوڵەتی دەکات و راپۆرتەکەی لەبارەی عێراق پێشکەش دەکات.