ئەمەریکا و بەریتانیا بنکەیەکی سەربازیی لە قامیشلۆ دەکەنەوە

دوای کۆبونەوەی نوێنەرانی پەرلەمانی بەریتانیا لەگەڵ بەرپرسانی رۆژئاوای کوردستان بڕیارە بنکەیەکی سەربازیی هاوبەشی ئەمەریکا و بەریتانیا لە شاری قامیشلۆ بکرێتەوە. ئاژانسی هەواڵی (هاوارنیوز) بڵاوی کردوەتەوە؛ نوێنەرانی پەرلەمانی بەریتانیا و نوێنەری پارتی کرێکارانی ئەو وڵاتە سەردانی رۆژئاوای کوردستانیان کردوە و لەگەڵ بەرپرسانی سەربازی و حکومی کۆبونەتەوە و دۆخی باکور و رۆژهەڵاتی سوریا-یان تاوتوێ کردوە. لە لایەکی دیکەوە چەند سەرچاوەیەکی سەربازیی کە ناویان بڵاو نەکراوەتەوە؛ ئاشکرایان کردوە واشنتۆن و لەندەن رێککەوتون بۆ ئەوەی بنکەیەکی سەربازیی هاوبەش لە شاری قامیشلۆ لە رۆژئاوای کوردستان بکەنەوە. بەرپرسێکی رۆژئاوای کوردستانیش رایگەیاندوە؛ تورکیا و روسیا و ئێران دەیانەوێت سوریا دابەش بکەن و لەو چوارچێوەیەشدا داهاتوی باکور و رۆژهەڵاتی سوریا دەکەوێتە ژێر مەترسییەوە بە تایبەت کە تورکیا رۆژانە هەڕەشەی پەلاماردانی رۆژئاوای کوردستان دەکات. موریس کلاسمەن، نوێنەری پارتی کرێکاران بە بەرپرسانی رۆژئاوای کوردستانی وتوە؛ ئێمە سەردانی کۆبانێ-مان کردوە و دەزانین تورکیا هاوکاریی تیرۆریستان دەکات و دەیەوێت هێرش بکاتە سەر کورد بەڵام ئێمە پشتگیریی رۆژئاوای کوردستان دەکەین و داوا لە لەندەن دەکەین راستەوخۆ پشتگیریی کورد بکات بۆ بەرەنگاربونەوەی نەیارانی. بڵاوبونەوەی ئەو هەواڵە لە کاتێکدایە نوێنەری هەردو پارتی پارێزگاران و کرێکارانی بەریتانیا لەگەڵ فەرماندە سەربازیی و بەرپرسانی خۆبەڕێوەبەریی رۆژئاوای کوردستان کۆبونەوە.

ز.س

Hits: 53
Category: