پۆچیتینۆ: نامەوێت مباپێ بە درێسی ڕیاڵ مەدریدەوە ببینم

 

پۆچیتینۆ دوپاتیکردەوە دەجەنگێت لە پێناو مانەوەی مباپێ لە یانەکەیدا و نایەوێت بە درێسی ڕیاڵ مەدریدەوە بیبینێت

لە لێدوانێکیدا بۆ کەناڵی کواترۆ، ماوریسیۆ پۆچیتینۆی راهێنەری یانەی پاریس سان جێرمان ڕایگەیاند، خۆی و یانەکەشی دەجەنگن لە پێناو رازیکردنی کیلیان مباپێ بۆ مانەوە لە ڕیزەکانیاندا.

پۆچیتینۆ وتی: هیچ ئازارێک نابینم کاتێک یاریزانێکی یانەکەم لە یانەیەکی تر ببینم بەڵام دوای تەنها سێ مانگ کار کردن لەگەڵ مباپێ دەڵێم نامەوێت بە درێسی ڕیاڵ مەدریدەوە بیبینم و بەهەموو هێزی خۆمەوە هەوڵی مانەوەی دەدەم.

سەبارەت بە ئەگەری گواستنەوەی ڕامۆس بۆ پاریس، پۆچیتینۆ دەڵێت: نامەوێت باسی یاریزانێک بکەم کە لە یانەیەکی تر یاریدەکات و دەبێت ڕێزی یانەکانی تر بگرین و باسی یاریزانەکانیان نەکەین.

وتیشی: زۆر پڕوپاگەندە هەیە لەسەر بازاڕی گواستنەوە بەدڵنیاییشەوە ئێمە یانەیەکین کار دەکەین بۆ باشترکردن و بەهێزترکردنی پێکهاتەکەمان بۆ وەرزی داهاتوو.

لە کۆتایشدا لەسەر میسی وتی: لەماوەیەکی نزیکدا داهاتووی میسی ڕوون و ئاشکرا دەبێت لەگەڵ بەرشەلۆنەدا.

یۆرۆپالیگ... ئەمشەو 4 یانە بلیتەکانی چوارگۆشەی زێڕین وەردەگرن

 

ئەمشەو هەر چوار یاری گەڕانەوەی قۆناخی 8ـی یۆرۆپالیگ لە یەک کاتدا، کاتژمێر10:00 بەڕێوەدەچن، کە هەموویان پڕ دەبن لە گیانی رکابەری، بەو پێیەی ئەنجامەکانی یارییەکانی چوون، هیچ کامێکیان بەشێوەیەکی یەکلاکەرەوە نەبووە و هەر هەموو تیپەکان بواریان بۆ ئەوە ماوە بلیتی سەرکەوتن لە بەرژەوەندی خۆیاندا یەکلابکەنەوە.

لەوانەیە مانچێستەر یونایتد باشترین هەڵوێستی هەبێت، کە لە یاری چووندا لە دەرەوەی یاریگەی خۆیدا، بە دوو گۆڵی بێبەرامبەر لە گرانادای ئیسپانی بردووەتەوە و ئەمشەو لەنێو یاریگەی ئۆڵترافۆرددا میوانداری گرانادا دەکات.

شەیتانە سوورەکان بەپشتبەستن بە ئەنجامی باشی یاری یەکەمیان و بەو سەرکەوتنە گەورەیەی لە پرێمەرلیگیشدا بەسەر تۆتێنهامدا بەدەستیانهێنا، ورەبەرزن و بە متمانەیەکی زۆرەوە بەرامبەر ئیسپانییەکان یاری دەکەن، بەڵام بە وریاییش، چونکە سۆلشایەر هەر زوو هۆشداری ئەوەی داوەتە یاریزانەکانی کە نابێت بە ئەنجامی یاریی چون هەڵبخەڵەتێن و پێویستە رێز لە گرانادا بگرن، کە لەبارەیەوە گوتی "ئێمە گرانادامان بەرامبەر بارسێلۆنا و ریال مەدرید بینیوە، دەزانین کە تیپێکی چەند بەهێزن".

ئارسیناڵ، یانە ئینگلیزییەکەی دیکەی ئەم پاڵەوانێتییە، ئەرکی ئاسان نییە و ئەمشەو یاریزانەکانی ئارتێتا دوور لە یاریگەی خۆیان پێویستییان بەوەیە ئاستێکی نموونەیی پێشکەش بکەن بۆ ئەوەی بلیتی پێشکۆتایی لە قورگی سلاڤیا پراگ دەربێنن، کە لە یاریی چووندا لە لەندەن ئاستێکی بەرزیان پێشکەشکرد و بە گۆڵێک لەگەڵ ئارسیناڵ یەکسانبوون.

مایکل ئارتێتای راهێنەر، پێویستە ئەمشەو یاری وەرز بکات لەپێناو رزگارکردنی داهاتووی خۆی و وەرزی ئارسیناڵ، چونکە ئەگەر دەربکرێن هەم چارەنووسی خۆی دەکەوێتە مەترسییەوە و هەم هیوای ئارسیناڵ بە گەیشتنەوە بە چامپیۆنزلیگ کۆتایی دێت، کە بەردەوام بوون لە یۆرۆپالیگ و بردنەوەی نازناوەکە تاکە رێگەیە بەرەو ئەو ئامانجە، کە لەوەتەی وەرزی 2016 - 2017 نەیتوانیوە یاری لە چامپیۆنزلیگدا بکات.

رۆما و ئایاکس لەسەر یاریگەی ئۆڵیمپیکۆ لە پایتەختی ئیتالیا، یارییە پڕ لە رکابەرییەکەی ئەمشەو ئەنجام دەدەن، کە سەرەڕای ئەوەی ئیتالییەکان لە هۆڵەندا 2 - 1 لە ئایاکسیان بردووەتەوە، بەڵام پاڵەوانی هۆڵەندا ئەو تیپە نییە کە بە ئاسانی خۆی بەدەستەوە بدات و بەدڵنیاییەوە یاریزانەکانی هێشتا لەپێناو پێچەوانە کردنەوەی ئەنجامی یاریی چوون تێدەکۆشن و هەوڵدەدەن ئەرکە زەحمەتەکە جێبەجێبکەن و بلیتەکە لە رۆماوە ببەنە ئەمستردام.

لەوانەیە ئەرکی ڤیاڕیالی ئیسپانیش زۆر زەحمەت نەبێت، کاتێک میوانداری دینامۆ زاگریبی کرواتی دەکات، بەو پێیەی لەنێو زاگریبدا بە گۆڵێکی بێبەرامبەر لێیبردووەتەوە، بەڵام سەرەڕای ئەوەش ئەو ئەنجامە دڵنیاکەر نییە و کرواتییەکان دەکرێت لەنێو یاریگەی ڤیاڕیالدا ئاستێکی بەرزتر پێشکەش بکەن و کێشە بۆ ئیسپانییەکان دروست بکەن.

 

یارییەکانی ئەمشەو:

مانچێستەر یونایتد - گرانادا
سلاڤیا پراگ - ئارسیناڵ
رۆما - ئایاکس
ڤیاڕیال - دینامۆ زاگریب

 

 

z.s

 

یۆرۆپالیگ... ئەمشەو یارییەكانی قۆناخی 8 دەستپێدەكات

 

ئەمشەو لە یۆرۆپالیگدا یارییەکانی چوونی قۆناخی هەشت بەڕێوەدەچن، ئارسیناڵ و مانچێستەر یونایتد ئەرکیان تا رادەیەک ئاسانە.

هەر چوار یارییەکە کاتژمێر 10 دەکرێن، یانەی ئارسیناڵ لە نێو یاریگای خۆیدا میوانداری یانەی سلاڤیا پراگی چیکی دەکات، لەو یارییەی یانە لەندەنییەکە بەبێ دەیڤد لویز و کیران تێرنی یاریدەکات.

لە یارییەکی دیکەدا ڤیاریال لەگەڵ یانەی دینامۆ زاگریبی کرواتی یاریدەکات.

یانەی مانچێستەر یونایتد لە ئیسپانیا بەرامبەر یانەی گراناد یاریدەکات، ئەو یانەیەی ناپۆلی لە خولەکەدا کردە دەرەوە، یانە ئیسپانییەکە 8 یاریزانی پێکانیان هەیە و یاریناکەن، لە مانچێستەریش دوو یاریزان یاریناکەن و ئێریک بایلیش تووشی کۆرۆنا بووە.

دوایین یاریش لە نێوان هەردوو یانەی ئەیاکس و رۆمادا دەبێت، بۆ ئەم یارییە لە ئەیاکس شەش یاریزان و لە رۆماش بە هەمان شێوە شەش یاریزان بەهۆی پێکان و هۆکاری جیاجیا یاریناکەن.

 

z.s

لوکاس ڤازکێز ئەم وەرزە ناتوانێت یاری بکاتەوە

 

لوکاس ڤازکێز، یاریزانی یانەی ریال مەدریدی ئیسپانیا بەهۆی ئەو پێکانەی لە یاری یانەکەی بەرامبەر بارسێلۆنا تووشی بووە، تاوەکو کۆتایی ئەم وەرزە ناتوانێت بەشداری یارییەکانی یانەکەی بکاتەوە.

ماڵپەری فەرمی یانەی ریال مەدریدی ئیسپانیا بەیاننامەیەکی فەرمی لەسەر پێکانی لوکاس ڤازکێز یاریزانی یانەکەیان بڵاوکردووە و لە بەیاننامەکەدا هاتووە، دوای ئەنجامدانی پشکنینە پزیشکیەکان، دەرکەوتووە ئەو یاریزانە لە ئەژنۆیدا تووشی پێکان بووە، بۆیە ماوەیەک لە یاریگاکان دوور دەکەوێتەوە.

سەرچاوەکە باسی لە وادەی دوورکەوتنەوەی نەکردووە، بەڵام رۆژنامەی وەرزشی مارکای نزیک لەم یانەیە ئاشکرای کردووە ڤازکێز تاوەکو کۆتایی ئەم وەرزە ناگەڕێتەوە یاریگاکان.

به‌ فه‌رمی فیفا سزا‌یه‌كه‌ی نوێ و قوڕستری به‌سه‌ر پلاته‌ر سه‌پاند

یەكێتی تۆپی پێی جیهان بەشێوەیەكی فەرمی جۆزێف سێپ بلاتەری سەرۆكی پێشووی یەكێتیەكە و جیرۆم فالكەی ئەمینداری پێشووی فیفای بۆ شەش ساڵ و هەشت مانگی دیكە سڕ كرد.

ئێوارەی ئەمرۆ فیفا لە پێگەی فەرمی خۆی رایگەیاند بلاتەر و جیرۆم فالكە بۆ شەش ساڵ و هەشت مانگی دیكە ناتوانن بەشداری هیچ چالاكییەكی وەرزشی بكەن و بە هەروەها سزادانیشان بە بڕی ملیۆنێك فرەنكی سویسری ئەمەش بەهۆی ئەوەی هەردووكیان دۆسیەی دیكەی گەندەڵیان بەسەردا ساخ بووەتەوە لە وەرگرتنی بەرتیل و بەكارهێنانی پۆستەكانیان بۆ بەرژەوەندی تایبەتی خۆیان.
پێشتر بلاتەر بەهۆی گەندەڵیەوە لە پۆستی سه‌رۆكایه‌تی یەكێتی تۆپی پێی جیهان دوورخرایەوە و تاكو ساڵی 2022 سزای بەسەردا سەپێنرا ئەمرۆش جارێكی تر سزایەكی نوێتری بەسەر سەپێندرا بەمەش بۆ ماوەی حەوت ساڵی دیكە ناتوانێت هیچ پۆستێك وەربگرێت.