یانەی بەنفیکا پرتوگالی سەرکەوتنی بۆ چامپیۆنز لیگ مسۆگەركرد

لە پاڵاوتنەکانی خولی یانە پاڵەوانەکاندا، بەنفیکا لە پاوک سالۆنیکای بردەوە و شانبەشانی ئایندهۆڤن سەرکەوتنی بۆ قۆناغی کۆمەڵەکان بەدەستهێنا.

لە یاری گەڕانەوەی قۆناغی کۆتایی پاڵاوتنەکانی خولی یانە پاڵەوانەکانی ئەوروپا، بەنفیکای پورتوگالی لە دەرەوەی یاریگای خۆیدا، رووبەڕووی پاوک سالۆنیکای یۆنانی بووەوە، کە لە یاری چووندا بە گۆڵێک بۆ هەردوولا یەکسانبوون.

بەنفیکا بە چوار گۆڵ بەرامبەر بە گۆڵێک یارییەکەی بردەوە و گۆڵەکانیشی لە خولەکەکانی ٢٠ و ٢٦ و ٣٩ و ٤٩دا لەلایەن ڤێرا و سالڤیۆ دوو گۆڵ و ئەلفۆنسۆوە تۆمارکرد و تاکە گۆڵەکەی پاوک سالۆنیکاش بریۆڤیچ لە خولەکی ١٣دا تۆماریکرد.

بەم ئەنجامەش، بەنفیکا شانبەشانی ئایندهۆڤنی هۆڵەندی سەرکەوتنی بۆ قۆناغی کۆمەڵەکانی وەرزی نوێی خولەکە بەدەستهێنا، کە یانە هۆڵەندیەکەش بە سێ گۆڵی بێ بەرامبەر لە باتی بۆریسۆڤی بیلاڕوسی بردەوە

بەهۆی میسییەوە سەرۆکی تۆپی پێی فەڵەستین بۆ ماوەی ساڵێک لەكارەكانی راگیرا

فیفا بە تۆمەتى هاندان بۆ توندوتیژى، بۆ ماوەى ساڵێک سزاى راگرتنى بەسەر سەرۆکى یەکێتى تۆپى پێى فەڵەستیندا جێبەجێکرد.

یەکێتى تۆپى پێى جیهان لە راگەیەندراوێکدا ئاشکرایکرد، بۆ ماوەى ساڵێک جبریل رجوبى سەرۆکى یەکێتى تۆپى پێى فەڵەستینى راگرتووە و بە بڕى ٢٠ هەزار فرانکى سویسریش سزاى مادى داوە، بە تۆمەتى هاندان بۆ توندوتیژى و رقڵێبوونەوە.

فیفا روونیکردووەتەوە، سەرۆکى ناوبراو هەڕەشەى لە یەکێتى تۆپى پێى ئەرجەنتین کردووە و داواى کردووە وێنە و درێسى لیۆنێل میسى کاپتنى ئەو هەڵبژاردەیە بسوتێنرێت، گەر ئەرجەنتین یارى دۆستانە لەگەڵ ئیسرائیل ئەنجامبدات.

بڕیاربوو ئەرجەنتین و ئیسرائیل لە پێش مۆندیالى ٢٠١٨ى روسیا و لە نۆى حوزەیرانى رابردوودا لە قودس یارییەکى دۆستانە ئەنجامبدەن، بەڵام لەلایەن ئەرجەنتینەوە هەڵوەشێندرایەوە، بەهۆى فشارى فەڵەستینیەکانەوە دژى ئیسرائیل

چیمان له‌ یانه‌ی ڕیاڵ مه‌درید بینی؟

سه‌ره‌تا ئه‌وه‌ی گرنگه‌ به‌ پێچه‌وانه‌ی زۆربه‌ی یارییه‌كانی پێشوو هه‌ست ده‌كرێت ستایلی یاریی یانه‌كه‌ گۆڕانی زۆری به‌سه‌ردا هاتووه‌، واته‌ لۆپێتیگی توانیه‌تی له‌م ماوه‌ كه‌مه‌دا شێوه‌ ته‌كتیكی خۆی و بیركردنه‌وه‌ی یاریی به‌سه‌ر یاریزانه‌كانیدا بسه‌پێنێت، كه‌ ئه‌وه‌ش وایكردووه‌ هیچ كام له‌ یاریزانه‌كان نه‌توانن پابه‌ندی ڕێكخراوی یاریی تیپه‌كه‌ نه‌بن، هه‌روه‌ها ئه‌مه‌ وایكردووه‌ یانه‌كان به‌ تایبه‌تی ئه‌مشه‌وی خیتاڤی توانای ئه‌وه‌یان نه‌بێت خاڵی لاوازی تیپه‌كه‌ ده‌ستنیشان بكه‌ن، به‌ بۆچونی من: تاڕاده‌یه‌ك ڕیاڵ ده‌توانێت له‌مجۆره‌ یاریانه‌ی ئه‌مشه‌و بۆ ماوه‌یه‌كی زۆر پارسه‌نگی ئاستی خۆی بپارێزێت، كه‌ به‌ هیچ كلوجێك ڕێگا نه‌ده‌درا تیپی ڕكابه‌ر تۆپ و ڕووبه‌ر ده‌ستبخه‌ن، ئێوه‌ ته‌ماشاكه‌ن یارییه‌كانی پێشووی یانه‌ی مێره‌نگی كاتێك تۆپ ده‌چووه‌ سه‌ر گۆڵچی، ئه‌وه‌ (كیلۆر ناڤاس) به‌ ته‌نیا له‌گه‌ڵ دوو یاریزان بۆ پارستنی گۆڵه‌كه‌ ده‌مانه‌وه‌، كه‌چی ئه‌مشه‌و دابه‌شبوونی ئه‌ستێره‌كانی تیپه‌كه‌ هه‌ڕه‌مه‌كی نه‌بوو، یاخود ده‌رچوون و یاریكردنه‌كه‌ سنوورداربوو، هه‌روه‌ها له‌كاتی دروستبوونی مه‌ترسی بۆسه‌ر گۆڵه‌كه‌یان هه‌ندێك كات نزیكه‌ی شه‌ش یاریزان له‌نیوه‌ یاریگای خۆیان ده‌مانه‌وه‌ به‌بێ‌ ئه‌وه‌ی كه‌لێن له‌ ناوه‌ندی یاریی تیپه‌كه‌دا دروست بێت، كه‌ هه‌ندێك له‌ یارییه‌كانی پێشوو كه‌س نه‌بوو له‌ قوڵایی سه‌نته‌ری یاریگا ڕوماڵی یاریی بۆ تیپه‌كه‌ بكات. ئه‌گه‌ر له‌سه‌ر ئاستی تاكی تیپه‌كه‌ قسه‌ بكه‌ین، ئه‌وه‌ ناتوانین ته‌نیا سۆپه‌ر ستارێك له‌ یاریی یانه‌كه‌دا دیاریی بكه‌ین، به‌ڵكو لۆپێتیگی ئه‌ستێره‌كانی به‌جۆرێك له‌سه‌ر یاریگاكه‌ دابه‌شكردبوو، ئه‌وه‌ هیچ كامیان به‌بێ‌ ئه‌وه‌ی دیكه‌ به‌ تایبه‌تی هێرشبه‌ره‌كان ناتوانن گه‌یاندنی تۆپه‌كان بۆ گۆڵی دژبه‌ر كۆتایی پێبهێنن، ئه‌مه‌ش وایكردبوو هیچ ئه‌ستێره‌یه‌كی ڕیاڵ هه‌ست به‌ فشاری ده‌روونی و كه‌می لایه‌نی جه‌سته‌یی و چوونه‌ده‌ره‌وه‌ له‌ بارودۆخی یارییه‌كه‌ نه‌كات، له‌ به‌رامبه‌ردا یاریزانه‌كانی خیتاڤی كه‌متر ده‌یانتوانی له‌گه‌ڵ كه‌شی یارییه‌كه‌ بێنه‌وه‌، چونكه‌ هه‌موو ئه‌وانه‌ی هه‌ڵگری تۆپه‌كان بوون ده‌یانتوانی گوشار بكه‌ن، نه‌ك به‌ پێچه‌وانه‌ی یارییه‌كانی پێشوو له‌ یانه‌ی ڕیاڵ ئامانجه‌كه‌ دیاربوو هه‌موو یاریزانه‌كان ده‌یانویست ته‌نیا گۆڵ بۆ ڕۆناڵدۆ دروست بكه‌ن، كه‌چی ئه‌مشه‌و ته‌نیا گۆڵ بۆ ئه‌وانه‌بوو نموونه‌ی كارڤاخال به‌زووی ده‌گه‌یشته‌ ناوچه‌ی سزای تیپی دژ. واته‌ له‌مكاته‌دا كۆدی یاریی تیپه‌كه‌ دیار نییه‌، تا ڕاكه‌به‌ره‌كانیان به‌ ئاسانی بتوانن ده‌ستی بخه‌ن. به‌ كورتی: ڕاهێنه‌ر به‌ یاریی شه‌وی پێشووی به‌ هه‌مووانی وت: ڕیاڵ ئامانجی وه‌رگرتنی تۆپ و هیشتنه‌وه‌یه‌تی بۆ ماوه‌یه‌كی درێژ، هه‌روه‌ها كاركردنی زۆره‌ بۆ ئازادبوونی ئه‌ستێره‌كان له‌ژێر كاریگه‌ری هه‌ژموونی ڕۆناڵدۆ و هاوسه‌نگی سه‌رجه‌م بنكه‌كانی یاریی تیپه‌كه‌، كه‌ له‌ ئێستادا ئه‌مه‌ مه‌به‌ستی یه‌كه‌می جولیان لۆپێتیگییه‌، پاشان كاركردن له‌سه‌ر خاڵی لاوازی ئه‌ستێره‌كان، تا پێكهاته‌ی بنه‌ڕه‌تی تیپه‌كه‌ به‌جۆرێك بێت وه‌ستانی ئه‌ستێره‌كانی له‌ یاریگادا بۆ له‌مه‌ودوا به‌شێوه‌یه‌كی هونه‌ری زانستی به‌رز بێت.

نووسینی:هه‌وراز كاوه‌

ئیڤان راکیتیچ: رۆژی دووشەممە هەمووشت یەکلادەبێتەوە

رۆژنامەی سپۆرتی نزیک لە یانەی بەرشەلۆنە ئاماژەی بەوە کردووە، ئیڤان راکیتیچی کرواتی تا ئێستا چارەنوسی دیارنییە و یاریزانەکە بڕیاریداوە دووشەممەی داهاتوو بە رۆشتن یان بە مانەوە لە یانەکە کەتەلۆنیەکەدا خۆی یەکلابکاتەوە.

رۆژنامەکە ئاماژەی بەوەش کردووە، یانەی پاریس سان جێرمان فەڕەنسی هەوڵ دەدات بە پارە سەرنجی راکیتیچ رابکێشێت و دەیەوێت بە ٩٠ ملیۆن یۆرۆ گرێبەستی لەگەڵ ئەنجامبدات.

راکیتیچی ٣٠ ساڵ، گرێبەستەکەی لەگەڵ بەرشەلۆنە لە ٢٠٢١دا کۆتایی دێت و سزای هەڵوەشاندنەوەشی ١٢٥ ملیۆن یۆرۆیە

یانەی هەولێر گەڕایەوە خولی نایابی عێراق

یانەی هەولێر لە دوا یاریی پاڵاوتنەکانی قۆناخی کۆتایی خولی یانە پلەیەکەکانی عێراق بۆ گەیشتن بە وەرزی داهاتووی خولی نایابی عێراق، لە نێو یاریگەی فەرەنسۆ هەریری و بە پشتیوانی هاندەرانی رووبەڕووی یانەی دیفاع مەدەنی بووەوەو یارییەکەی لێبردەوە.

هەولێر لە یارییەکەدا لە ژێر سەرپەرشتی عومەر مەجید راهێنەری نوێ، ئاستێکی بەرزی پێشکەشکرد و یارییەکەی بە چوار گۆڵی بێ وەڵام لێبردەوەو سێ خاڵی دیکەی بەدەستهێنا.

گۆڵەکانی هەولێر لەلایەن تیاگۆ ئێدواردۆ سێ گۆڵ و بارزان شێرزاد گۆڵێک تۆمارکران.

بەم بردنەوەیە هەولێر بووە خاوەنی 11 خاڵ لە پێشەنگی کۆمەڵەی یەکەم و سەرکەوت بۆ خولی نایابی عێراق.

لة وەرزی 2016-2017 بە هۆکاری سیاسی و ئەمنی لە خولی نایابی عێراق پاشەکشەی کرد و دواتر یەکێتی تۆپی پێی عێراق یانەکەی دابەزاند بۆ خولی پلەیەک و وەرزی رابردوو بێبەشبوو لە خولەکە، ئەمساڵ بەشداری لە خولی پلەیەک کرد و بە یەکەمی کۆمەڵەی یەکەم گەڕایەوە خولی نایابی عێراق.